上海街头这些小店，让城市充满烟火气

搿家理发店勒自忠路浪，如果勿是熟人，估计走过根本就勿晓得搿里向有一爿理发店。我问老板，剃头个人多伐，老板讲，最近顾客主要还是以附近居民为主。想到自家曾经两个多号头呒没剃过头了，当时看到剃头师傅是多么亲切啊。

茂名北路五金建材店到了。搿家小店店面勿大，东西倒是蛮多个，屋里向物事坏忒了，就近来配一只。对于搞装修个人家，也是邪气方便。

南汇路搿家照相馆开了70多年了，蛮有历史个，记录了着几代人个记忆。现在，大家有了数码相机、智能手机，拍照老方便个，但是勒老一辈人个记忆当中，老底子去照相馆拍一张照，是生活个仪式感。据讲，现在还是有一些客人来此地拍摄全家福唠啥。

照相馆隔壁是一家钟表维修店，修理师傅讲，伊拉是前几天恢复营业个。两个客人坐勒旁边等修手表。我觉着，钟表维修店还是有存在必要个，平常手表电池呒没电了，自己换电池勿方便，有搿能一爿小店就可以解决问题了。

搿是奉贤路个手机维修店，搿条小马路浪有好几家，大家现在买手机是勿成问题，但是修手机，肯定是要就近解决。

再过去是一家古玩调剂店，屋里向如果有勿需要个旧家具、旧物事唠啥，可以送到迭搭调钞票。

上海个搿些小店，伊拉呈现个勿单单是商业场景，更像是“城市经济的毛细血管”。相信随着城市加快经济恢复与重振，搿些生机勃勃个小店会带来更多个烟火气。

声明：本网站所提供的信息仅供参考之用,并不代表本网赞同其观点，也不代表本网对其真实性负责。您若对该稿件内容有任何疑问或质疑，请尽快与上海热线联系，本网将迅速给您回应并做相关处理。联系方式:shzixun@online.sh.cn